Në Durrës, pjesëmarrja në homazhin-protestë “Drejtësi për Eglin” ishte e ulët, po zëri i reagimit qytetar nuk mungoi. Mungesa e pjesëmarrjes mund të jetë pasojë e mungesës së organizimit të mirëfilltë. Edhe pse të pranishmit nuk ishin të shumtë, situata mbartte një peshë të rëndë emocionale dhe morale për komunitetin.
Ndër personat e paktë që morën pjesë ishte edhe Josiba Osmani, oficere sigurie në gjimnazin publik “Gjergj Kastrioti”. Ajo vendosi lule në homazh të kujtimit të Egli Progës, duke shprehur ngushëllimet e saj të sinqerta për familjen dhe motrën e viktimës. Osmani, në fjalën e saj, theksoi se familja nuk është e vetme në këtë dhimbje dhe se të gjithë ata që kërkojnë drejtësi duhet të jenë të bashkuar në këtë përpjekje.
Me një indinjatë të dukshme, ajo bëri apel për një shtet të së drejtës. Ajo kërkoi verifikimin e integritetit profesional të atyre që hetojnë ngjarjet dhe marrin vendime lidhur me to, duke theksuar rëndësinë e një sistemi drejtësie që u shërben qytetarëve dhe mbron interesat e tyre.
Kjo pjesëmarrje e ulët dhe zëri i Osmanit reflektojnë një shqetësim të thellë në lidhje me mënyrën se si trajtohen çështjet e rëndësishme të drejtësisë dhe sigurisë në vend. Zëri qytetar i Josibës thekson nevojën urgjente për qytetarë të angazhuar dhe një sistem institucionesh ligjzbatuese dhe drejtësie që duhet të mbrojë medoemos qytetarët dhe të drejtën e tyre themelore për jetën duke siguruar drejtësi pêr të gjithë në shoqëri.
@zërionline
