Porti i Durrësit ka mirëpritur këtë të diel anijen turistike “Nautica”, pjesë e flotës së kompanisë Oceania Cruises, e cila mbërriti me 665 turistë në bord, duke konfirmuar nisjen intensive të sezonit të kroçerave në vend.
Anija, me gjatësi 181 metra dhe me flamur të Ishujve Marshall, u ankorua në kalatën nr. 5 të portit. Në bord ndodheshin turistë kryesisht nga Shtetet e Bashkuara të Amerikës, por edhe nga Mbretëria e Bashkuar, Kanadaja, Australia dhe vende të tjera.
“Nautica” rikthehet edhe këtë vit në Portin e Durrësit si pjesë e itinerarit të saj mesdhetar, duke sjellë qindra vizitorë të huaj të interesuar për të njohur Shqipërinë.
Gjatë qëndrimit ditor, turistët po vizitojnë qytetin e Durrësit, si dhe destinacione të tjera me rëndësi historike, kulturore dhe turistike, duke kontribuar edhe në gjallërimin e aktivitetit ekonomik lokal.
Me mbërritjet e njëpasnjëshme të anijeve turistike gjatë ditëve të fundit, Porti i Durrësit ka hyrë zyrtarisht në sezonin e kroçerave, duke vijuar të mirëpresë vizitorë nga vende të ndryshme të botës dhe duke forcuar pozicionin e tij si porta kryesore e turizmit detar në Shqipëri e rajon.
©ZëriOnline
