Komisioni Evropian ka konfirmuar se nga 10 Nëntori i këtij viti, në shtetet e zonës Shengen do hyjë në fuqi edhe kontrolli elektronik i pasaportave për hyrje-daljet e pasagjerëve, që nuk janë shtetas të Bashkimit Evropian.
Sistemi i hyrje-daljeve (EES) do të jetë një sistem i automatizuar për regjistrimin e udhëtarëve nga vendet e treta, sa herë që kalojnë një kufi të jashtëm të BE-së.
Sistemi do të regjistrojë emrin e personit, llojin e dokumentit të udhëtimit, të dhënat biometrike, përfshirë këtu gjurmët e gishtërinjve dhe fotografimin e fytyrës.
“Ne po ndërtojmë një sistem të ri mbi ndërveprimin me bazat e të dhënave që mund të komunikojnë mes vete. Do të mirëpresim miliona vizitorë në Evropë në një mënyrë më të lehtë, dhe më të qetë. Kështu, për shembull, me sistemin e hyrje-daljes nuk do të kemi më kontroll manual të pasaportave. Dhe kjo do të shmangë dhe radhët, vonesat nga kontrollet manuale”, tha Anita Hipper, zëdhënëse e KE-së.
Sistemit i hyrje-daljes në BE u krijua që në nëntor 2017, po zbatimi i tij është shtyrë disa herë. Këtij sistemi do i nënshtrohen shtetasit e afro 60 vendeve, përfshirë edhe ata të Ballkanit Perëndimor.
©️zërionline
