Kontrollet në Portin e Durrësit kanë çuar në zbulimin e një ngarkese me gurë mineralë dhe kristale të ndryshme, të cilat dyshohet se po transportoheshin jashtë Shqipërisë në mënyrë të paligjshme.
Sipas njoftimit të Doganës së Durrësit, zbulimi u bë gjatë kontrollit të një kamioni në linjën e tragetit Durrës-Bari. Pas verifikimit të imazheve të skanerit, në dy çanta u konstatuan mostra minerale me ngjyra dhe forma të ndryshme.
Materialet u bllokuan dhe, në bashkëpunim me Policinë Kufitare të Durrësit, nisi verifikimi i rastit për të përcaktuar natyrën e tyre dhe ligjshmërinë e transportit.
Nga fotot duken si ekzemplarë mineralogjikë, disa prej të cilëve kanë kristale të formuara natyrshëm, ndërsa identifikimi i saktë kërkon analizë laboratorike.
Eksporti i mineraleve dhe i objekteve me vlerë të veçantë mund të kërkojë dokumentacion, në varësi të natyrës, origjinës dhe klasifikimit të tyre. Shqipëria ka gjithashtu mekanizma për kontrollin e lëvizjes ndërkufitare të objekteve me vlera kulturore e historike.
Megjithatë, nuk ka ende të dhëna që provojnë se gurët e sekuestruar janë minerale të rralla, me vlerë të lartë apo pjesë e trashëgimisë kulturore. Kjo mbetet për t’u përcaktuar nga ekspertiza dhe verifikimet e autoriteteve.
Zëri Online
