Pas vdekjes së 17-vjeçares nga Durrësi me meningit akut, mungesa e informacionit nga autoritetet shëndetësore ka rritur pa sigurinë, por Zëri Online mëson jozyrtarisht se masa janë marrë dhe po merren. Menjëherë pas vdekjes së Noela C. ka nisur trajtimi profilaktik, parandalues i personelit mjekësor në Urgjencën Spitalore të Durrësit, si dhe familjarëve të saj, ndërsa pritet edhe përcaktimi i nëntipit të shtamit nga analizimi në laboratorët e ISHP-së, që do të ndihmojë më tej në përcaktimin e ndërhyrjes dhe përhapjes së kësaj sëmundjeje infektive. Sipas ZVA Durrës, masa po merren edhe në gjimnazin “Leonik Tomeo” ku mësonte 17-vjeccarja. Ambientet e tij do të dezinfektohen, ndërsa autoritetet shëndetësore po investigojnë rastin dhe kontaktet e tjera të vajzës që humbi jetën në shërbimin infektiv të QSUT-së. Deri tani nuk paraqitet asnjë rast tjetër me simptoma të ngjashme.
Ndonëse ka pasiguri dhe paqartësi në komunitet, autoritetet e shëndetit publik në Durrës, Njësisë Vendore të Kujdesit Shëndetësor nuk i janëë përgjigjur kërkesave për të sqaruar opinionin publik në lidhje me masat e marra.
Gjimnazistja u paraqit të shtunën në Urgjencën e Spitalit Rajonal të Durrësit me dhembje koke, të vjella dhe simptoma të tjera. Një gjendje që u përkeqësua me shpejtësi duke i shkaktuar vdekjen dhe pse u dërgua menjëherë në QSUT.
Mjekët në spitalin e Durrësit shprehen jashtë kamerave se kjo formë e meningitit kishte shumë kohë që nuk shfaqej në Durrës, ndaj po investigohet nga autoritetet e shëndetit public për të kuptuar burimin dhe parandaluar përhapjen e sëmundjes.
Në Shqipëri, ndryshe nga shumë vende të tjera, vaksina kundër meningitit bakterial nuk është pjesë e kalendarit të detyrueshëm të vaksinimit, duke rritur kështu rrezikun për popullatën. Ky rast tragjik ka rikthyer vëmendjen te nevoja për forcimin e masave parandaluese dhe futjen e vaksinës në programin e imunizimit kombëtar.
©️zërionline
