Në atmosferën festive të fundvitit, hyrja e gjimnazit “Leonik Tomeo” në Durrës, e zbukuruar me kujdes dhe shije, mban gjurmën e një kontributi të veçantë, dorën e 17-vjeçares Noela Caka. Ajo ndërroi jetë në mënyrë të papritur në fundjavë, duke lënë pas një boshllëk të thellë mes familjes, shokëve dhe mësuesve të saj.
Noela, e cila ishte një nga nxënëset aktive ndërroi jetë në Qendrën Spitalore Universitare të Tiranës (QSUT) pas diagnostikimit me meningit akut, një sëmundje e rrallë dhe e rëndë në këtë moshë, që në rastet e avancuara mund të jetë fatale. Trishtimi dhe shoku për këtë ngjarje u përhapën me shpejtësi në komunitetin e saj, duke i lënë të gjithë të pikëlluar.
Sipas burimeve nga shkolla, vetëm një javë më parë, Noela kishte marrë pjesë në një ekskursion me shokët e saj në Voskopojë. Të premten, një ditë para përkeqësimit të gjendjes së saj shëndetësore, ajo kishte qenë në shkollë si zakonisht, duke mos shfaqur asnjë shenjë shqetësimi. Gjendja e saj u përkeqësua papritmas të shtunën, kur familjarët e dërguan në spital për ndihmë mjekësore, por fatkeqësisht nuk arriti të mbijetonte.
Nxënësit dhe stafi pedagogjik i gjimnazit “Leonik Tomeo” janë në zi për këtë humbje të parakohshme, ndërsa kanë marrë masa profilaktike për të shmangur sëmundjen. Dekorimet festive që ajo kishte ndihmuar të realizoheshin këtë fundvit tani shihen si një kujtesë e ndjeshme për gëzimin dhe pozitivitetin që ajo sillte në shkollë.
Autoritetet shëndetësore janë duke kryer hetime për rrethanat e sëmundjes së saj, ndërsa ekspertët po u bëjnë thirrje prindërve dhe mësuesve të jenë vigjilentë ndaj simptomave të meningitit, si ethe, dhimbje koke të forta dhe përgjumje.
Ngjarja ka rikthyer vëmendjen te rëndësia e ndërgjegjësimit për sëmundjet infektive, veçanërisht gjatë periudhave të motit të ftohtë, kur virusi mund të përhapet më lehtë. Ndërkohë, qytetarët dhe familjet e nxënësve të shkollës kanë shprehur solidaritetin e tyre me familjen Caka në këto ditë të dhimbshme.
Humbja e Noela Cakës ka lënë pas një plagë të thellë, por edhe një mesazh të fuqishëm për kujdesin ndaj shëndetit dhe rëndësinë e ruajtjes së kujtimeve të çmuara që njerëzit na lënë pas.
©️zërionline
