Thyen arrestin e shtëpisë dhe organizon një grabitje në bashkëpunim. Në parkingun e një lokali në fshatin Borakë të Xhafzotajt, dy shtetas kanë kërcënuar me thikë dy persona dhe u kanë marrë celularët. Ata janë larguar më pas me një automjet tip “Benz”. Ngjarja ndodhi në orët e mbrëmjes, ndërsa ndërhyrja e Policisë çoi në arrestimin e njërit prej autorëve, ndërkohë që tjetri është shpallur në kërkim.
Specialistët për Hetimin e Krimit në Komisariatin e Policisë Shijak kanë arrestuar në flagrancë shtetasin Orland Kondo, 28 vjeç, banues në Shijak, ndërsa kanë shpallur në kërkim bashkëpunëtorin e tij, Fabian Çalliku, gjithashtu 28 vjeç dhe banues në Shijak. Ky i fundit kishte thyer masën e sigurisë “Arrest në shtëpi” dhe u largua me shpejtësi në këmbë pasi braktisi automjetin.
Policia ka sekuestruar automjetin tip “Benz” të përdorur nga autorët, ndërsa vijojnë kërkimet intensive për kapjen e personit të shpallur në kërkim.
Materialet procedurale i janë dorëzuar Prokurorisë pranë Gjykatës së Shkallës së Parë Durrës për veprime të mëtejshme ligjore.
©️zërionline
