Sot kanë dalë rezultatet e provimit të Matematikës për Maturën Shtetërore 2025 dhe publikimi i tyre ka sjellë menjëherë një fluks të madh hyrjesh në platformën zyrtare qeveritare e-Albania.
Mijëra maturantë janë përpjekur të aksesojnë portalin për të parë notat e tyre, por përballen me vështirësi teknike për shkak të ngarkesës së lartë. Përdoruesit raportojnë se faqja ngarkohet me vonesë, ndërsa në disa raste nuk arrijnë të futen fare në sistem.
Ministria e Arsimit ka njoftuar se rezultatet mund të aksesohen vetëm përmes profilit personal të secilit maturant në e-Albania, në seksionin përkatës të Maturës Shtetërore. Sipas të dhënave të para, provimi i Matematikës është ai që tradicionalisht sjell më shumë ankth për nxënësit, ndaj dhe interesi për notat është shumë i lartë.
Ndërkohë, shumë prindër dhe nxënës kërkojnë që Ministria e Arsimit të marrë masa për të garantuar funksionimin normal të sistemit, duke kujtuar se e njëjta situatë është përsëritur edhe në vitet e mëparshme.
Rezultatet e provimeve janë të rëndësishme për përzgjedhjen në universitet, ndaj çdo vonesë apo vështirësi teknike shton stresin e maturantëve në këtë periudhë vendimtare.
©️zërionline
