Tik-Toku vazhdon të dëshmojë akte dhune dhe veprimtarinë e paligjshme të të rinjve që përdorin armë duke nxitur dhe të mitur e të rinj të tjerë të ndjekin modelin e tyre.
Pas videove që kishin publikuar në këtë aplikacion, ku shfaqeshin duke kryer qitje me armë zjarri, gjatë natës, në Durrës u arrestuan 6 të rinj , të moshave 18-20 vjeç dhe një i mitur u vu në hetim në gjendje të lirë. Ata u kapën në flagrancë me armë zjarri kallashnikov, në një kodër në fshatin Hamallaj ku do të bënin qitjen e rradhës. Po ashtu policia ka prangosur edhe babanë e njërit prej djemve, i cili kishte dhe një pushkë pa leje në banesë.
Mirlind Sula 19 nga Rrushkulli, Klivan Pepkolaj 19, Klajdi Jaku 20, Aurel Toshi 18, Andi Hajdarkolaj 19 dhe Eljos Toshi 19, të pestë nga Tirana, ranë në prangat e policisë, ndërsa një i mitur 17 vjeç është proceduar penalisht për moskallëzim krimi. Të rinjtë u kapën në flagrancë pas sigurimit të informacionit, se po përgatiteshin për të qëlluar në kodrën e fshatit Hamallaj, me armë zjarri që i posedonin pa leje, me qëllim postimin e videove në rrjetin social “TikTok”.
Gjatë operacionit u gjet arma e zjarrit kallashnikov me të cilën të rinjtë kryenin qitje. Gjatë kontrollit në shtëpinë e Mirlind Sulës në fshatin Rrushkull të Durrësit u kap dhe arrestua dhe babai i tij. Në shtëpinë e 56-vjeçarit Njazi Sula, policia gjeti dhe sekuestroi një armë zjarri pushkë dhe municion luftarak. Së bashku me 2 armët, një kallashnikov dhe një pushkë, u sekuestruan 2 automjetet me të cilat lëviznin këta shtetas, si dhe 8 celularë.
©zërionline
