Mbrëmjen e kaluar, sheshi kryesor i Durrësit u kthye në një arenë të kulturës dhe traditave, duke pritur DurrësFest, festivalin folklorik ndërkombëtar, që mblodhi së bashku ansamble folklorike nga disa vende të Ballkanit dhe Evropës. Me pjesëmarrjen e grupeve nga Shqipëria, Kosova, Italia, Polonia, Turqia dhe Maqedonia e Veriut, festivali solli një festë ngjyrash, ritmesh dhe vallesh tradicionale.
Moderatorja Jilldiz Nebi nga Ohri, bashkëorganizatore e DurrësFest, thotë për Zëri Online se festivali shënoi edicionin e tij të katërt dhe shpreson që të ngjallë dhe më shumë interes tek publiku në sezonet e ardhshme.
Ansamblet e ndryshme nga Durrësi, Drenica, Sçilia, Ostrovsko, Izmiri etj. u ngjitën në skenën e ngritur para teatrit “Aleksandër Moisiu” të qytetit bregdetar, duke prezantuar një pjesë të trashëgimisë kulturore të vendit dhe krahinës. Nga vallet energjike shqiptare, te muzika tradicionale italiane dhe polake dhe deri te tingujt orientale të grupeve nga Turqia, spektatorët përjetuan një larmi të kulturave.
“Jam nga New York dhe më pëlqen të eksploroj kulturat e ndryshme. Më pëlqen ky vend. Shoh shumë familje bashkë. Plazhi, natyra janë fantastike. Edhe ky festival që sjell traditën dhe bashkon vendet përmes valles dhe muzikës tradicionale. Më pëlqyen shumë kostumet popullore të grupit turk dhe muzika e grupit që po performon tani, Kosovës. Shqiptare, apo jo?”, u shpreh një turist amerikan që vazhdimisht filmonte pjesë të ndryshme nga aktiviteti për t’i marrë me vete si pjesë të kujtimeve të krijuara nga pushimet në Shqipëri.
Edhe një çift lituanez që po pushon në Durrës këto ditë u shprehën të kënaqur nga eventi
“Është bukur të jesh këtu. Na pëlqen. Muzikë e këndshme. Edhe vallet, kostumet. Atmosferë e bukur.”
Ky festival dhe të tjerë të këtij lloji jo vetëm që promovojnë turizmin kulturor, kulturën dhe traditat, por gjithashtu forcojnë lidhjet midis popujve të ndryshëm, duke krijuar ura miqësie përmes artit dhe muzikës popullore, që gjithnjë e më shumë pëlqehet nga qytetarët e kombësive të ndryshme.
©️zërionline
