Vali Qyrfyçi
Mbrëmjen e kaluar, u hap në Durrës Bienalja Ndërkombëtare e Artit Bashkëkohor, një event që bashkon artistë nga vende të ndryshme të botës. Ky edicion i parë sjell së bashku 17 Pavijone Kombëtare dhe përfshin pjesëmarrjen e 40 artistëve nga vende si Shqipëria, SHBA, Kosova, Italia, Finlanda, Maqedonia e Veriut, Gjermania, Bregu i Fildishtë, Kina, Argjentina, Turqia, Suedia, Zvicra, Peruja, Rumania, Republika Domenikane dhe Tajvani.
Ekspozitat janë shpërndarë në disa prej institucioneve dhe hapësirave publike të Durrësit, duke përfshirë Bashkinë, Prefekturën, Teatrin “Aleksandër Moisiu”, Qendrën Kulturore të Fëmijëve, Bibliotekën Publike, Mauzoleun e Dëshmorëve, Pallatin e Sportit “Ramazan Njala” dhe disa prej monumenteve të trashëgimisë kulturore si Amfiteatri Romak, Kulla Veneciane, Forumi Bizantin dhe Hamami Mesjetar. Përmes këtyre hapësirave, qyteti jo vetëm që shërben si një platformë për artin bashkëkohor, por edhe si një destinacion turistik për të gjithë vizitorët që eksplorojnë Durrësin gjatë kohëzgjatjes së Bienales.
Artistët pjesëmarrës kanë interpretuar temën qendrore të këtij edicioni të parë: “Inteligjenca artificiale: e ardhmja hibride”, një qasje që jo vetëm frymëzon imagjinatën e artistëve bashkëkohorë, por thekson edhe kompleksitetin e ekzistencës njerëzore, në një kufi mes racionales dhe irracionales, reales dhe surreales.
Në çeljen e Bienales Ndërkombëtare të Artit Bashkëkohor në Durrës, vëmendje tërhoqi dhe mungesa e disa prej titullarëve të programuar për të folur gjatë ceremonisë së hapjes. Kjo mungesë, e papritur në këtë event, krijoi vonesa të panevojshme dhe boshllëqe në prezantimet e planifikuara, duke zhgënjyer disi audiencën dhe të ftuarit. Ndërkohë, organizatorët arritën të mbajnë ritmin e ceremonisë, duke theksuar rëndësinë e artit dhe të tematikës së këtij edicioni.
Gjatë ceremonisë së hapjes, u shpallën dhe çmimet kryesore të Bienales. Pavioni më i mirë u vlerësua ai i SHBA-së, me artistët Gregory de la Haba dhe [dNASAb], ndërsa Çmimi Special për Artistin e Ri më të Mirë shkoi për Lai Junjie nga Kina. Çmimi i Karrierës në Skulpturë u nda mes skulptorit Sadik Spahija nga Shqipëria dhe Oliviero Rainaldi nga Italia. Në fushën e fotografisë, u nderua Zeng Yi nga Kina, i cili nuk ishte i pranishëm në ceremoni, ndërsa për pikturë, çmimin e mori piktori Bujar Luca nga Shqipëria.
Bienalja, e ideuar dhe kuruar nga Oltsen Gripshi, do të vazhdojë deri më 24 nëntor 2024, duke i dhënë mundësinë publikut të shijojë krijimet e artistëve nga e gjithë bota në një nga qytetet më të vjetra e më të pasura me histori të Shqipërisë.
©️zërionline
