Policia e Shtetit ka kryer një seri kontrollesh në Shijak në kuadër të hetimeve të SPAK që kanë çuar në arrestimin e dy të dyshuarve, Jurgis Cyrbja dhe Ahmet Masha, ndërsa vijon kërkimi për Altin Hajrin, pronar i kompleksit “Golden”. Kontrollet u zhvilluan pas miratimit të Gjykatës së Posaçme të Shkallës së Parë për Korrupsionin dhe Krimin e Organizuar, e cila pranoi kërkesën e Prokurorisë për kryerjen e veprimeve hetimore të zgjeruara.
Mbrëmjen e kaluar gjatë operacionit, policia ekzekutoi 2 nga tre vendimet e gjykatës, duke kontrolluar banesa, automjete dhe persona të lidhur me hetimet. Si rezultat, u sekuestruan disa sende të dyshuara si prova materiale, përfshirë pesë telefona celularë, një hard disk i jashtëm Verbatim, një pajisje regjistrimi, një shumë monetare prej 1,100 eurosh, si dhe dokumente pronësie.
Hetimet për këtë rast të ndërlikuar vijojnë, ndërsa autoritetet po përpiqen të mbledhin prova të reja që mund të ndihmojnë në zbardhjen e plotë të veprimtarisë kriminale dhe identifikimin e personave të tjerë të përfshirë.
Prokuroria e Posaçme ka falënderuar Europolin, Eurojustin dhe autoritetet franceze për mbështetjen dhe bashkëpunimin gjatë hetimeve, si dhe Drejtorinë e Përgjithshme të Policisë së Shtetit për rolin e saj të rëndësishëm në ekzekutimin e masave të sigurimit dhe kryerjen e kontrolleve.
©️zërionline
