E mërkura mbrëma në skenën e teatrit “Aleksandër Moisiu” ishte tërësisht për pianisten e re dhe të talentuar, Kristel Karagjozi. Koncerti recital shënoi përshëndetjen e saj me publikun vendas, pas përfundimit të studimeve në shkollën e mesme artistike “Jan Kukuzeli” dhe në prag të nisjes së një rruge të re akademike në Austri.
Kristeli ka ndjekur pasionin për pianon që prej moshës 7-vjeçare.
“Ka qenë një dëshirë e madhe e imja dhe e familjes sime. Pianoja më ka shoqëruar gjatë gjithë rrugëtimit tim dhe do të vazhdojë të jetë pjesë e jetës sime,” shprehet ajo.
Repertori i koncertit përfshinte disa nga kryeveprat e muzikës klasike nga kompozitorë si Sibelius, Bach, Schubert dhe Prokofiev, të cilat u interpretuan me mjeshtëri, duke rrëmbyer duartrokitjet e publikut pas çdo performance. Një moment i veçantë dhe emocional i recitalit ishte dedikimi ndaj kompozitorit dhe muzikologut të njohur, Edmond Buharaja që u nda papritur nga jeta pak kohë më parë.
Mësuesja e saj, Linda Zemblaku, vlerësoi Kristelin si një talent të jashtëzakonshëm, i cili ka shkëlqyer jo vetëm në skenat shqiptare, por edhe në ato ndërkombëtare.
“Rikthimi në Shqipëri mbetet gjithnjë një mundësi e hapur,” thekson Kristeli, duke shtuar se “jeta është plot surpriza, ndaj kurrë mos thuaj kurrë!”
Një nga momentet më emocionuese të mbrëmjes ishte performanca e përbashkët e Kristelit me mësuesen e saj Linda Zemblaku dhe vajzën e saj, Xheni Turku, një pjesë me tri palë duar, që vulosi këtë natë të këndshme për artdashësit durrsakë.
V.Q.
©️zërionline
