Në Ditën Ndërkombëtare Kundër Korrupsionit, Partia Demokratike, Dega Durrës, ka dënuar ashpër atë që e cilëson si “mega-afera” e Portit të Durrësit. Sipas deklaratës, ky projekt është grabitja më e madhe e taksapaguesve shqiptarë dhe një barrë e rëndë për qytetarët e Durrësit, të orkestruar nga qeveria e Edi Ramës.
PD thekson se Porti i Durrësit, një nga më të vjetrit në Europë me vlerë prej 3.8 miliardë eurosh dhe një sipërfaqe prej mbi 1.4 milionë m², iu “dhurua” investitorit Mohamed Alabbar në kundërshtim me ligjet shqiptare. Deklarata vijon të akuzojë se përfituesi i vërtetë është vetë kryeministri Rama.
Ngarkesa për taksapaguesit
Partia Demokratike denoncon ndryshimin e ligjit të prokurimeve për ndërtimin e Portit të Ri në Porto Romano, një projekt që do t’u kushtojë taksapaguesve deri në 2 miliardë euro. Vetëm për tre vitet e ardhshme, qytetarët pritet të paguajnë mbi 400 milionë euro nga buxheti i shtetit. Ndërkohë, tenderi për portin e ri ka dështuar për shkak të mungesës së interesit nga kompanitë, duke e thelluar krizën.
Humbja e një nyjeje strategjike
Me zhvendosjen dhe mbylljen e portit ekzistues, PD paralajmëron për ndërprerjen e arterieve strategjike të transportit që e bëjnë sot Portin e Durrësit një nyje kyçe rajonale.
Të tjera afera të denoncuara
Deklarata e PD-së evidenton edhe disa çështje të tjera që rëndojnë mbi qytetin:
– Ekoparku në Spitallë: Akuzat lidhen me përfitimin prej 11 milionë eurosh nga familjarë të kryeministrit pa procedura konkurruese.
– Transportimi i mbetjeve: Bashkia Durrës paguan mbi 40 euro/ton për mbetje të dërguara në një incenerator të papërfunduar në Tiranë, duke konsumuar 40% të buxhetit të bashkisë.
– Veliera: Një projekt që ka përpirë dyfishin e fondeve të miratuara dhe ende nuk ka përfunduar pas një dekade.
Angazhimet e PD-së:
Partia Demokratike angazhohet të vazhdojë denoncimin e çdo afere korruptive dhe të promovojë një qeverisje transparente. Ajo thekson se edhe faktori ndërkombëtar ka kritikuar korrupsionin në Shqipëri, duke e cilësuar qeverinë aktuale si më të korruptuarën në Europë përmes tre rezolutave të njëpasnjëshme.
PD mbyll deklaratën me një premtim: “Me një qeveri të udhëhequr nga Partia Demokratike, Shqipëria do të ketë një të ardhme të bazuar në ndershmëri dhe transparencë.”
©️zërionline
