Elvis Babaliu u kap teksa po tentonte t’u shiste kanabis nxënësve të një shkolle 9-vjeçare. Operacioni policor i koduar “Cleaning”, i organizuar nga specialistët e Seksionit për Hetimin e Narkotikëve dhe shërbimet e Forcës së Posaçme “Shqiponja”, goditi një rast të shitjes së lëndëve narkotike në doza, në afërsi të shkollave të qytetit të Durrësit.
Në kuadër të këtij operacioni, u kap dhe vu në pranga shtetasi Elvis Babaliu, 41 vjeç, banues në Durrës, i cili dyshohet se ka ushtruar aktivitetin kriminal të shitjes së kanabisit. Gjatë kontrollit të kryer në flagrancë, i janë gjetur disa doza të lëndës narkotike, kanabis, të ndara për shitje.
Operacioni u realizua bazuar në informacionet e siguruara në rrugë operative për aktivitetin e paligjshëm të shitjes së lëndëve narkotike afër shkollave. Në momentin e kapjes, Babaliu ishte i shoqëruar nga pesë nxënës të një shkolle 9-vjeçare, të cilëve dyshohet se do t’u shiste lëndë narkotike.
Policia e Durrësit ka sekuestruar lëndën narkotike dhe ka dorëzuar materialet procedurale në Prokurorinë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.
©️zërionline
