Gjykata ka vendosur masën “Arrest në shtëpi” për 37-vjeçarin Diomet Musa, autorin e dyshuar të plagosjes së biznesmenit Arben Cipa, Kryetar i Shoqatës së Operatorëve Turistikë. Musa, i cili ka precedentë penalë të mëparshëm, u lirua nga qelia në më pak se 48 orë pas arrestimit.
Ngjarja ndodhi të premten rreth orës 16:10, kur biznesmeni 52-vjeçar u sulmua fizikisht me sende të forta. Pas sulmit, Musa u fsheh në një banesë në Lukovë, ku u kap nga policia në mbrëmje, ndërsa kushëriri i tij, Markelian Musa, 29 vjeç, është ende në kërkim.
Prokurorja e çështjes B. Sadikaj kërkoi cilësimin të ligjshëm të arrestimit në flagrancë dhe kërkoi caktimin e masës së sigurisë “Arrest në shtëpi” për Diomet Musën. Nga ana tjetër, gjyqtarja Esmeralda Shehu vendosi miratimin e kësaj mase, duke urdhëruar që i dyshuari të mos largohet nga banesa e tij në lagjen nr. 3 të Sarandës.
Ndërkohë, vetë Arben Cipa ka kërkuar ndërhyrjen e shtetit, duke denoncuar situatën e rënduar të sigurisë në Sarandë. Sipas tij, qyteti po kontrollohet nga “të paprekshmit” dhe “të fortët”, të cilët janë në qendër të konflikteve të pronësisë dhe kërcënimeve ndaj qytetarëve.
©️zërionline
