Ermal Luku, 41 vjeç, banues në Manzë të Durrësit, është arrestuar nga autoritetet shqiptare në kuadër të operacionit policor “Operacionalja 18”. Ai ishte shpallur në kërkim ndërkombëtar për llogari të Italisë, si pjesë e operacionit antidrogë “Tornado”, që synonte goditjen e trafikut të lëndëve narkotike.
Sipas njoftimit të policisë, arrestimi i Lukut u realizua falë shkëmbimit të informacionit ndërmjet inteligjencës policore shqiptare dhe partnerëve italianë.
Gjykata e Brescias në Itali kishte lëshuar më 29 shtator 2024 një urdhër arresti ndërkombëtar ndaj tij, duke e akuzuar për përfshirje në trafikun e lëndëve narkotike në kuadrin e një organizate kriminale.
Aktualisht, autoritetet shqiptare po bashkëpunojnë me Interpol Tiranën dhe Interpol Romën për të përgatitur procedurat e ekstradimit të tij në Itali, ku do të përballet me akuzat e ngritura nga drejtësia italiane.
©️zërionline
