Nën qiellin e hapur të Durrësit dhe në arenën e një prej monumenteve më të rëndësishme historike të vendit, muzika e bukur e vendeve të Mesdheut u ndërthurr me magjinë e lashtësisë. Amfiteatri antik u mbush me tingujt e koncertit “Meloditë e Mesdheut”, ku publiku përjetoi një mbrëmje unike, ku e shkuara dhe e tashmja u bashkuan në një spektakël artistik mbresëlënës, përmes koncertit “Meloditë e Mesdheut”, një ide dhe realizim artistik i sopranos së njohur Inva Mula.
Për herë të parë në këtë skenë monumentale, një nga zërat më të njohur të skenës operistike shqiptare dhe ndërkombëtare interpretoi për publikun durrsak dhe vizitorët, duke sjellë një repertor të zgjedhur që përshkoi brigjet e Mesdheut.
E shoqëruar nga pianisti Ekland Hasa dhe violonçelisti Redi Hasa, si dhe nga kori i fëmijëve “Okarina”, sopranoja magjepsi audiencën në Amfiteatrin e Durrësit
Publiku, vendas dhe i huaj, përjetoi një udhëtim muzikor përgjatë brigjeve të Mesdheut, duke bërë bashkë vendet e kulturat.
Koncerti “Meloditë e Mesdheut” u kthye në një ngjarje që do të mbahet gjatë mend, si nga më të bukurat e këtij sezoni veror.
©️zërionline
